14 აპრილს დედაენის ბაღში გაიმართა დედაენის დღისადმი მიძღვნილი ღონისძიებები

14 აპრილს დედაენის ბაღში გაიმართა დედაენის დღისადმი მიძღვნილი ღონისძიებები, რომელსაც სახელმწიფო ენის დეპარტამენტის თავმჯდომარე გიორგი ალიბეგაშვილი დაესწრო. საზოგადოებას საშუალება ჰქონდა დაეთვალიერებინა იაკობ გოგებაშვილის არქივზე დაყრდნობით მომზადებული საინფორმაციო ფოტობანერები. გაცნობოდნენ ილიას, აკაკისა თუ სხვა თანამედროვეთა მოგონებებსა და ჩანაწერებს იაკობ გოგებაშვილზე. მსურველებს შეეძლოთ, „დედაენის“ 1920 წლის გამოცემის სტამბური კლიშეების ასლების მეშვეობით, თავად დაებეჭდათ "დედაენის" გვერდები. გამოფენილი იყო დედაენისთვის შექმნილი ლექსებისა და მოთხრობების ორიგინალი სამუშაო ვერსიები, რეცენზიები „დედა ენის“ შესახებ და სოლომონ ასლანიშვილი-ბავრელის მიერ შექმნილი „დედაენა“. სტუმრებს საშუალება ჰქონდათ ზიარებოდნენ კალიგრაფიის რთულ და შემოქმედებით საქმიანობას. გაიმართა წიგნების გამოფენა-გაყიდვა და რამდენიმე წიგნის პრეზენტაცია, რომელთა ავტორებმა საკუთარი შემოქმედებიდან ამონარიდები წაიკითხეს.