საქართველოს პარლამენტში დედაენის დღისადმი მიძღვნილი მიღება

11 აპრილს, დედაენის დღესთან დაკავშირებით, საქართველოს პარლამენტში მიღება გაიმართა. ღონისძიებას ესწრებოდნენ პარლამენტისა და მთავრობის წევრები, აკადემიური წრეების წარმომადგენლები, საჯარო და კერძო სექტორიდან მოწვეული სტუმრები, ეთნიკური ქართველები ფერეიდნიდან და თურქეთიდან.
დამსწრე საზოგადოებას მიესალმა სახელმწიფო ენის დეპარტამენტის თავმჯდომარე გიორგი ალიბეგაშვილი. მან დეპარტამენტის ამოცანებზე ისაუბრა. საქართველოს პარლამენტის განათლების, მეცნიერებისა და კულტურის კომიტეტის თავმჯდომარემ ბოლო წლებში სახელმწიფო ენის დასაცავად განხორციელებული ღონისძიებები შეაჯამა. მან ასევე ყურადღება გაამახვილა სამომავლო ღონისძიებებზე, რომელიც დაგეგმილია ენის დასაცავად.

სტუმრებმა დაათვალიერეს 1978 წლის მოვლენების ამსახველი საარქივო მასალა, ტარას არქიმანდრიტის ნახატები, რომელთა საფუძველზეც შეიქმნა გოგებაშვილისეული დედაენის ანბანი, ოთარ ქანდარიას მიერ ქართული ანბანის ასო-ბგერებზე შექმნილი ორნამენტულ-დეკორატიული ნამუშევრები, ექსპოზიცია „ქართულისა და საქართველოს დარაჯი“, რომელიც იაკობ გოგებაშვილის პირადი არქივის ორიგინალებს მოიცავს.

დამსწრე საზოგადოება გაეცნო 1978 წლის 14 აპრილის ქრონოლოგიას, გამოხმაურებას საერთაშორისო საზოგადოებასა და პრესაში, ქართული ენის შენარჩუნებისა და სწავლების საკითხს ფერეიდანსა და თურქეთში. ღონისძიებაზე წარმოდგენილი იყო ქართული ანბანის სამი სახეობა, როგორც კულტურული მემკვიდრეობის ძეგლი.